ಹೆಣ್ಣು ನೀನಾಗು ಸಂಸಾರಕೆ ಕಣ್ಣು…

ಹೆಣ್ಣು ಮನೆಯ ತೊರೆದ ಮೇಲೆ
ಮನೆಗೆ ಶಾಂತಿ ಎಲ್ಲಿದೆ //
ಸೊಸೆಯು ಧರ್ಮ ಮರೆತ ಮೇಲೆ
ಮದುವೆಗೇನು ಬೆಲೆಯಿದೆ //

ತಂದೆ ತಾಯಿ ನಮ್ಮ ಜೀವ
ನೋಡಬೇಕು ನಮ್ಮ ದೈವ
ಅವರ ಒಲುಮೆ ಸಿಕ್ಕ ಮೇಲೆ ರಾಣಿಯಲ್ಲವೇ //
ನೀತಿಯಿಂದ ಬಾಳಬೇಕು
ಮನೆಗೆ ಖುಷಿಯ ನೀಡಬೇಕು
ತಂಗಿ ತಮ್ಮ ನೊಂದುಕೊಂಡು ಅಳುವುದಿಲ್ಲವೇ //

ಕೂಸು ಇದ್ದ ಮನಕೆ ನನಗೆ
ಕಾಸು ನೀಡಿ ಬೆಳೆಸಿ ಕೊನೆಗೆ
ಜೀವ  ಕಲಿಸಿ ಬೆಳಕು ಹರಿಸಿ ದಣಿದ ಮುಗ್ದರು //
ಶಕ್ತಿ ನಿಂತ ಮನೆಯ ದೀಪ
ನೋವಿನಲ್ಲಿ ಬೇಡ ಶಾಪ
ನನ್ನ ತಾಯಿ ನೋವ ಪಟ್ಟು ಜೀವ ಬಿಡುವರು //

ಎದೆಯ ಭಾರ ಮಾಡಬೇಡ
ನೋವ ನೀಡಿ ಹೋಗಬೇಡ
ಜೀವದರಸಿ ನಿನ್ನ ನಂಬಿ ಕಟ್ಟಿಕೊಂಡೆನು //
ನೂರು ಕನಸ ಹೊತ್ತ ಮನಕೆ
ಸೂರು ಕಳಚಿ ಬಿದ್ದ ಹಾಗೆ
ಹೋಗಿ ಬರಿದು ಮಾಡಬೇಡ ಮೋಸ ಮಾಡೆನು //

-ಮಧುಮತಿ ರಮೇಶ್ ಪಾಟೀಲ್