ಜಿಜ್ಞಾಸೆ………

ನಾ ಜೀವನದಲ್ಲಿ ಕಳೆದ ವಸಂತಗಳ ನೆನೆದಾಗ
ಮನವರಿಕೆಯಾಯಿತು ಎನಗೆ ಉಳಿದಿರುವ ದಿನಗಳು ಕೆಲವೇ ಕೆಲವೆಂದು

ಸಿಹಿ ತಿಂಡಿಗಳ ಗೆದ್ದು ಆಸೆಯಿಂದ ಗಬಗಬನೆ ತಿಂದು
ಉಳಿದ ತುಣುಕುಗಳ ರುಚಿಯ ಮನಸಾರೆ ಸವಿಯುವ

ಆಡುವ ಮಗುವಿನಂತಾಗಿದೆ ನನ್ನಯ ಪರಿಸ್ಥಿತಿ

ಅಂತಸ್ತುಗಳು ವಿವಿಧ ನಿಯಮಾವಳಿಗಳು ಆಂತರಿಕ ಗೊತ್ತುವಳಿಗಳು
ಇವುಗಳ ಬಗ್ಗೆ ಚರ್ಚಿಸುವ ದೀರ್ಘ ಸಭೆ ಕೂಟಗಳ ಮೇಲೆ ಎನಗೆ ವಿಶ್ವಾಸವಿಲ್ಲ

ವಯಸ್ಸಾಗಿದ್ದರೂ ಇನ್ನೂ ಬೆಳೆಯದಿರುವ
ಸಾಮಾನ್ಯ ಜ್ಞಾನವಿಲ್ಲದ ಜನರೊಂದಿಗೆ ಬೆರೆಯಲು ತಾಳ್ಮೆಯಿಲ್ಲ

ನನ್ನ ಕಾಲಾವಧಿ ಬಹು ಸೀಮಿತವಾಗಿದೆ
ನನ್ನ ಆತ್ಮ ಹೊರಡುವ ಅವಸರದಲ್ಲಿದೆ

ನನಗೆ ನಿಜಜೀವನದ ಸ್ವಾದ ಬೇಕಾಗಿದೆ
ಬಾಳ ಬುತ್ತಿಯಲಿ ಉಳಿದ ಸಿಹಿ ತುಣುಕುಗಳು ಕೆಲವೇ ಕೆಲವು

ಜವಾಬ್ದಾರಿಗಳಿಗೆ ಹೆಗಲು ಕೊಡುವ
ಸತ್ಯ ಪ್ರಾಮಾಣಿಕತೆಯೇ ಉಸಿರಾಗಿರುವ

ತಮ್ಮದೇ ತಪ್ಪುಗಳನ್ನು ಪರಿಹಾಸ್ಯ ಮಾಡಿ ನಗುವ
ವಾಸ್ತವ ಅರಿತ ಮನುಜರ ನಡುವೆ ಕೊನೆಗಾಲ ಕಳೆಯುವಾಸೆ

ಹೀಗೆ ಮಾನವೀಯ ‌ಮೌಲ್ಯಗಳ‌ ಎತ್ತಿ ಹಿಡಿಯುವಾಸೆ
ಜೀವನದಲ್ಲಿ ಕಡು ಕಷ್ಟಗಳನ್ನುಂಡರೂ ಇನ್ನೊಬ್ಬರ ನೋವಿಗೆ ಮಿಡಿಯುವ
ಹೃದಯವಂತರೊಡನೆ ಒಡಗೂಡುವಾಸೆ

ಕಹಿಯನ್ನುಂಡು ಸಿಹಿಯಾದ ಫಲವ ಕೊಡುವ ವೃಕ್ಷಗಳ ಆಶ್ರಯಿಸುವ ಪರಮಾಸೆ

ಹೌದು…. ನನಗೆ ಹೊರಡುವ ಕಡು ಅವಸರವಿದೆ
ಘನ ಉದ್ದೇಶದ ಬದುಕು ನನ್ನದಾಗಬೇಕೆಂಬ ಬಯಕೆಯಿದೆ

ಉಳಿದ ಅಮೂಲ್ಯ ದಿನಗಳ ಸಾರ್ಥಕತೆಯ
ಪಡೆಯಲು ನಿಜವಾದ ಪ್ರೌಢಿಮೆಯಿದೆ

ಇದುವರೆಗೂ ಸವಿದ ಸಿಹಿ ಖಾದ್ಯಗಳಿಗಿಂತ
ಮಿಕ್ಕಿರುವ ರಸಾಯನಗಳ ಸವಿ ಜಾಸ್ತಿ ಎಂಬುದ ನಾ ಬಲ್ಲೆ

ಪ್ರೀತಿಸಿದವರೊಡಗೂಡಿ ಶಾಂತಿ ನೆಮ್ಮದಿಯಿಂದ
ಬಾಳ ಅಂತಿಮ ಗುರಿಯ ತಲುಪುವಾಸೆ ಸ್ವ ಪ್ರಜ್ಞೆಯಿಂದ ಸಮಾಧಾನದಿಂದ

ಎಮ್ಮ ಪಾಲಿಗೆ ಎರಡೆರಡು ಜೀವನಗಳು
ಎರಡನೆಯದು ಪ್ರಾರಂಭವಾಗುವುದು
ನಮಗಿರುವುದು ಒಂದೇ ಒಂದು ಜೀವನ ಎಂದು ಅರಿವಾದಾಗ

(ಬ್ರೆಜಿಲ್ ಕವಿತೆಯ ಭಾವಾನುವಾದ)

-ಕೆ.ಎಂ ಶರಣಬಸವೇಶ