ಮುಕ್ತಕಗಳು

1

ಮೊದಲಾಗಿ ಗಣಪನಿಗೆ ಬಾಗಿಹೆನು ಪೊಡಮಡುತ
ಮುದಮನದಿ ನೆನೆಯುತಲಿ ಬಹು ಭಕುತಿಯಿಂದ
ಪದತಲವ ಸುಮಗಳಲಿ ಪೂಜಿಸುತ ವಂದಿಸುವೆ
ವರನೀಡಿ ಸಲಹೆಮ್ಮ ಬನಶಂಕರಿ

2

ಮನದೊಳಗೆ  ಸುಳ್ಳುಗಳ ಕಂತೆಯನು ಹೆಣೆಯುತಿರೆ
ಮನದಲ್ಲಿ ಮುಳ್ಳಿನಾ ಬಾಣವದು ನಾಟಿ
ನನಸಿನಲಿ ನೆಮ್ಮದಿಯ ಬಾಗಿಲದು ತೆರೆಯುವುದು
ಅನುದಿನವು ನಿಜ ನುಡಿಯೆ ಬನಶಂಕರಿ

3

ಬಿಳಿಯಿರುವ ಸಕಲವೂ ಹಾಲೆಂದು ನಂಬದಿರು
ಒಳಿತು ಕೆಡುಕುಗಳೆಡೆಗೆ ನಿಗವಿಡಲು ಬೇಕು
ಮಲಿನವಾಗಿಹ ಮನವ ತಿಳಿಗೊಳಿಸುತಿರುವಂತೆ
ಬಲ ನೀಡಿ ಹರಸು ನೀ ಬನಶಂಕರಿ 

4

ಅಡೆತಡೆಗಳಾಗದೆಯೆ ಕೆಲಸಗಳು ತಾ ನಡೆದು
ಕಡಿಮೆ ಸಮಯದ ಒಳಗೆ ಜಯಭೇರಿ ಹೊಡೆದು
ಒಡನಾಡಿಗಳು ನಾವು ಹರುಷದಲಿ ಮಿಂದೆದ್ದು
ಕರಮುಗಿದು ವಂದಿಪೆವು ಬನಶಂಕರಿ

5

ಗರಗರನೆ ತಿರುಗುತಿವೆ ಬುಗರಿಗಳು ಎಡೆಬಿಡದೆ
ತರತರದ ಪಥಗಳಲಿ ಬ್ರಹ್ಮಾಂಡದಲ್ಲಿ
ಸರಿಯಾಗಿ ಮಾಡುತಲಿ ನಿತ್ಯ ಕಾಯಕಗಳನು
ವಿರಮಿಸದೆ ಸಾಗುತಿರು ಬನಶಂಕರಿ

–ಶಂಕರಿ ಶರ್ಮ, ಪುತ್ತೂರು.