ಬಲವಿದೆ ಎಂದು……

ಬಲವಿದೆ ಇಂದು ಹಾರಾಟ ಮಾಡುವೆ
ನಾಳೆಗೆ ಏನು ಗೊತ್ತಿಲ್ಲ
ನನ್ನ ಅಸ್ತಿತ್ವವನೆ ಅಳಿಸಿ ಹಾಕುವೆ
ಮುಂದಿನ ಸತ್ಯವ ಅರಿತಿಲ್ಲ//೧//

ದರ್ಪವು ಇಹುದು ಹಣಬಲ ಇಹುದು
ನಿನಗೇ ಗೆಲುವು ಎನ್ನುವೆ ನೀ
ಕಾಲನ ಸೆಳೆತಕೆ ಸಿಕ್ಕಿದ ಮೇಲೆ
ಬದುಕಿನ ಸತ್ಯವ ತಿಳಿಯುವೆ ನೀ//೨//

ಎಲ್ಲರು ನಾವು ಜಗದಲಿ ಎಂದೂ
ಕಾಲನು ಕುಣಿಸುವ ಗೊಂಬೆಗಳು
ಆತನು ಬೀಸುವ ಗಾಳಿಗೆ ತೂರುವ
ಒಣಗಿ ಹಾರುವ ಜಳ್ಳುಗಳು//೩//

ದೇಹದಿ ನೆತ್ತರು ಚಿಮ್ಮುತಲಿರಲು
ಅರ್ಥವೆ ಆಗದು ಗೋಳು
ರಕ್ತದ ಹರಿವು ಕುಗ್ಗುತ ಸಾಗಲು
ತಿಳಿಯುವೆ ನಶ್ವರ ಬಾಳು//೪//

ಇಂದಿನ ಶಕ್ತಿ ನಾಳೆಗೆ ನಶಿಸಲು
ಕಲಿಯುವೆ ಜೀವನ ಸತ್ಯ
ಬಾಗಿದ ಬಾಳೆಯ ಗೊನೆಯೊಲು ನಾವು
ಬದುಕಲು ಬೇಕಿದೆ ನಿತ್ಯ//೫//

ಹರೆಯವು  ಹುರುಪು ಎಲ್ಲವು ಇದ್ದರೂ
ಗೋಡೆಗೆ ತಲೆಯ ಜಜ್ಜದಿರು
ಕಾಲನ ಕುಣಿಕೆಯು ಕೋಳವ ಹಾಕಲು
ದೇಹವ ತ್ಯಜಿಸಲು ಮರುಗದಿರು//೬//

–ಶುಭಲಕ್ಷ್ಮಿ ಆರ್ ನಾಯಕ